evryting mi do wrang!
evryting mi do wrang!
mi eat – mi wrang
mi faas – mi wrang
mi sleep – mi wrang
mi bleech – mi wrang
mi run – mi wrang
mi walk – mi wrang
mi talk – mi wrang
mi silent – mi wrang
wat ah bangarang!
mi dedd tiad fi wrang
mi nuh perfek 
(yet)
nobaddy noh perfek, mi seh
soh why di fallibility
mi ah get judge soh daily?
even when mi right – mi wrang
no rhythm nar rhyme mi nuh have
an mi caan sing mi owna song
evry single, striking, solitary ting – mi do wrang?
how can one man be soh wrang?
mi caan get noh bligh fram
some ah mi unda-performance?
but mi get despise
an mi get malice
mi get bex wid
an mi get nutten
cause mi judge fi be rotten
mi tiad fi wrang!
dem seh two wrangs noh mek a right
but alla my six an nine-tenths right dem still mek wrang
mi waan wrangle fram
dis dissing indictment of being wrang
cause if mi hug – mi wrang
an if mi fold mi han – mi wrang
nex ting yuh agoh hear seh – mi wrang
fi write bout seh – mi always wrang
all when mi jussa vent – mi wrang
but if mi neva vent – mi wudda still be wrang
soh it noh matta weh mi do –  mi wrang
soh yuh know weh mi agoh do?
yuh agoh have time when mi don’t do
and den anodda time when mi do do.
yuh wrang me?



Austin G. Henry